DOMINGO 2, ÁS CATRO E CUARTO, NO CAMPO MUNICIPAL RAMÓN DIÉGUEZ DE PONTECESURES.
FURIA – ARAÑO
ENTRADA ÚNICA: TRES (3) EUROS.
Mais, que pasa co Araño?
Santa Baia do Araño é unha parroquia que se localiza no norte do concello de Rianxo. No ano 2013 tiña 1.372 habitantes (667 homes e 715 mulleres), distribuídos en 25 aldeas, o que reflicte unha diminución en relación ao ano 2004, cando tiña 1.512 habitantes, e ao ano 1999, cando tiña 1.655 habitantes.
O Agro da Moa, O Batán, Buía, O Campelo, Cantalarrana, A Capela, O Carballal, A Casilla, Cerqueiras, Contrés, A Ermida, A Ferrería, Foxacos, Os Lemos, As Miráns, O Outeiro, A Pontenova, Pousada, O Rabado, O Toural, Traba, A Varela, O Vilar, Os Xens e Os Xufreus son as aldeas que compoñen esta emblemática e histórica parroquia rianxeira.
Xunto á casa reitoral da parroquia atópase o meirande hórreo de toda Galicia, en canto a lonxitude (36,75 metros a cámara e 37,05 m o celeiro, con 2,40 m de anchura e 2,70 m de altura media) e capacidade (cámara 109,31 m³, celeiro 59,09 m³). Foi construído a mediados do século XVII. A estrutura está levantada sobre un balo de pedras graníticas de cachotería.
Emilio Cao compuxo unha preciosa canción adicada á Fonte do Araño.
Fonte do Araño
onde eu de rapaz
a teu carón xogaba no verán.
Onde vai o teu rego, onde vai,
que eu teño sede e non o podo atopar.
Auga da freixa
camiño do meu fogar
baixando pola veiga e polo val.
Fonte do Araño
o tempo pintou no chan
camiños que dan voltas sen parar.